Ысык-Атадагы мыйзамсыз таштанды жайы үчүн айыл өкмөткө айып салынды

Интернет булактарында жарыяланган мыйзамсыз таштанды төгүүчү жай тууралуу маалыматтын негизинде текшерүү жүргүзүлүп, Нурманбет айыл өкмөтүнө 17 миң сом айып пул салынды.

Жаратылыш ресурстары, экология жана техникалык көзөмөл министрлигинин маалыматына ылайык, сөз Чүй облусунун Ысык-Ата районуна караштуу Нурманбет айыл аймагындагы Ысык-Ата курортуна жакын жерде жайгашкан мыйзамсыз таштанды төгүүчү жай тууралуу болуп жатат.

Аталган маалымат боюнча Экологиялык жана техникалык көзөмөл кызматынын Чүй регионалдык башкармалыгынын инспекторлору жеринде текшерүү жүргүзгөн.

Текшерүүнүн жыйынтыгында Нурманбет айыл өкмөтүнө Укук бузуулар жөнүндө кодекстин 115-беренесине ылайык 17 миң сом өлчөмүндө айып пул салынды.

Учурда "Нурманбет-Биримдик" муниципалдык ишканасы тарабынан аталган аймакты тазалоо иштери жүргүзүлүүдө.