Караколдо фитосанитардык талаптарды сактабаган ишкерлерге эскертүү берилди
Ветеринардык жана фитосанитардык көзөмөл кызматынын борбордук аппаратынын өкүлдөрү Ысык-Көл облусунун Каракол шаарындагы агроаптекаларда жана гүл саткан соода жайларында мониторинг жүргүзүштү. Бул тууралуу Айыл чара министрлигинен билдиришти.
Кызматтын маалыматына ылайык, учурда Каракол шаарында 13 агроаптека жана 16 гүл саткан дүкөн иш алып барат.
Мониторингдин жүрүшүндө фитосанитардык талаптардын сакталышы, өсүмдүктөрдү коргоо каражаттарын сатууга уруксат берүүчү документтердин жана фитосанитардык сертификаттардын болушу текшерилди.
Жыйынтыгында талаптарды толук сактабаган айрым ишкердик субъектилеринин ээлерине мыйзамдардын талаптары боюнча түшүндүрүү иштери жүргүзүлүп, аныкталган кемчиликтерди кыска мөөнөттө жоюу боюнча сунуштар берилди.
Ветеринардык жана фитосанитардык көзөмөл кызматы мындай мониторингдер фитосанитардык коопсуздукту камсыз кылуу, өсүмдүктөрдүн зыянкечтери менен илдеттеринин жайылышына жол бербөө жана ишкерлердин мыйзам талаптарын сактоосун көзөмөлдөө максатында үзгүлтүксүз жүргүзүлөрүн билдирди.
