Соң-Көлдө мыйзамсыз жүргөн автоунааларга 66 миң сом айып салынды
Соң-Көл аймагында жайыттарды жана өзгөчө корголуучу жаратылыш аймактарын сактоо боюнча рейддик иш-чара өткөрүлүп, анын жүрүшүндө мыйзам талаптарын одоно бузган 12 учур аныкталды. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, мыйзам бузуулар боюнча тиешелүү административдик чаралар көрүлүп, жалпы суммасы 66 миң сом айып пул салынды.
Рейд Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын инспекторлору тарабынан Нарын облусунун Жол кыймылынын коопсуздугун камсыздоо кызматы менен биргеликте Министрлер Кабинетинин №330 токтомунун талаптарын аткаруу максатында уюштурулган.
Иш-чаранын негизги максаты – жайыттарда жана өзгөчө корголуучу жаратылыш аймактарында автоунаалардын, мотоциклдердин жана квадроциклдердин мыйзамсыз жүрүүсүнүн алдын алуу.
Министрлик белгилегендей, транспорт каражаттарынын жашыл өсүмдүк катмарын тебелеп өтүүсү жайыттардын деградациясына, топурактын бузулушуна, эрозиялык процесстердин күчөшүнө жана табигый экосистемалардын жабыркашына алып келет.
Буга байланыштуу жарандар жайыттарды жана жаратылыш байлыктарын сактоого жоопкерчилик менен мамиле кылууга жана жаратылышты коргоо боюнча мыйзамдардын талаптарын так сактоого чакырылды.
