Караколдогу мектеп-интернат 477 млн сомго капиталдык оңдоодон өтүүдө
Каракол шаарындагы Т. Сатылганов атындагы кыздар жана балдар мектеп-интернаты толук капиталдык оңдоодон өткөрүлүүдө. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, оңдоо иштери республикалык бюджеттин эсебинен каржыланып, долбоордун жалпы сметалык наркы 477 миллион сомду түзөт.
Учурда объектте капиталдык оңдоо иштери кызуу жүрүп жатат. Имараттын чатыры толугу менен алмаштырылып, ички жасалгалоо жана инженердик тармактарды жаңылоо иштери жүргүзүлүүдө.
Мектеп-интернаттын жалпы аянты 10 650 чарчы метрди түзүп, үч корпустан турат. Имарат 1963-жылы 800 окуучуга ылайыкталып курулган. Ошондон бери бул объект биринчи жолу толук капиталдык оңдоодон өткөрүлүп жатат.
Долбоордун алкагында имараттын сырткы көрүнүшү жаңыланып, бардык инженердик коммуникациялар заманбап талаптарга ылайык модернизацияланат. Ошондой эле окуу класстары, китепкана, ашкана жана жыйындар залы толугу менен жаңыланат.
Министрлик белгилегендей, капиталдык оңдоо иштеринин жүрүшү жана сапаты ведомство тарабынан туруктуу көзөмөлдөнүүдө.
