Ошто уруксатсыз курулуп жаткан объекттин иши токтотулду

Ош шаарында архитектуралык-уруксат берүүчү документтери жок курулуп жаткан объект аныкталып, курулуш иштери убактылуу токтотулду. Бул тууралуу Курулуш, архитектура жана турак жай-коммуналдык чарба министрлигинен билдиришти.

Маалыматка ылайык, Мамлекеттик архитектура-курулуш контролдоо департаментинин Ош шаардык башкармалыгы аймактагы курулуш объектилерине жүргүзүлгөн кезектеги текшерүүнүн жүрүшүндө мыйзам бузуу фактысын аныктады.

Министрликтин маалыматына ылайык, Ош шаарынын Сатиев көчөсү, 13-даректе жайгашкан жеңил типтеги курулуш объектиси архитектуралык-уруксат берүүчү документтери жок курулуп жаткан.

Бул факт Кыргыз Республикасынын "Шаар куруу жана архитектура жөнүндө" мыйзамынын талаптарын бузуу катары бааланды.

Текшерүүнүн жыйынтыгында курулуш иштерин жүргүзүп жаткан К.А.М.га карата административдик чара көрүлүп, мыйзам бузууларды жоюу боюнча жазуу түрүндө эскертүү берилди.

Ошондой эле мыйзам талаптары толук аткарылганга чейин объекттеги курулуш иштери убактылуу токтотулду.