Жаратылыш парктарында накталай эмес төлөм системасы ишке кирди
Кыргызстандагы үч өзгөчө корголуучу жаратылыш аймагында автоматташтырылган өткөрмө пункттары орнотулуп, эс алуучулар үчүн накталай эмес төлөм жүргүзүү мүмкүнчүлүгү түзүлдү.
Жаратылыш ресурстары, экология жана техникалык көзөмөл министрлиги өзгөчө корголуучу жаратылыш аймактарын санариптештирүү жана натыйжалуу башкаруу максатында жаңы автоматташтырылган өткөрмө пункттарын орнотту.
Министрликтин маалыматына ылайык, мындай өткөрмө пункттары "Кыргыз-Ата", "Беш-Таш" мамлекеттик улуттук жаратылыш парктарында жана "Падыша-Ата" мамлекеттик коругунда ишке киргизилди.
Белгиленгендей, жаңы система жаратылыш аймактарын коргоону күчөтүүгө, транспорт каражаттарынын кирип-чыгуусун так эсепке алууга жана финансылык ачык-айкындуулукту камсыз кылууга багытталган.
Ошондой эле эс алуучулар эми кызмат акысын банктык карталар, QR-код жана электрондук капчыктараркылуу накталай эмес төлөй алышат. Министрликтин маалыматына караганда, бул чечим тейлөөнүн сапатын жогорулатып, адам факторун азайтууга жана кирешелерди ачык-айкын эсепке алууга мүмкүндүк берет.
Мындан тышкары, учурда Сары-Челек мамлекеттик биосфералык аймагында жана "Кыргыз-Ата" мамлекеттик улуттук жаратылыш паркында заманбап архитектуралык талаптарга жооп берген жаңы кире бериш аркаларынын курулушу башталды. Бул долбоорлор аймактардын инфраструктурасын жакшыртып, туристтер үчүн ыңгайлуу шарттарды түзүүгө жана туристтик потенциалды жогорулатууга багытталган.
