Бишкекте мыйзамсыз курулушту токтотпогон компанияга 213 миң сом айып салынды
Мамлекеттик архитектура-курулуш контролдоо департаментинин Бишкек шаардык башкармалыгы мыйзам талаптарын бузуу менен курулуш иштерин жүргүзгөн "Император Строй" ЖЧКсына карата чара көрдү. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, Горький көчөсү 72, 72а жана Гвардия көчөсү 13, 13а даректеринде курулуп жаткан 10 кабаттуу көп батирлүү турак үйгө текшерүү жүргүзүлгөн.
Маалыматка ылайык, буга чейин объект боюнча "Долбоорлоо жана куруу процесстерин айкалыштыруу жөнүндө" буйрук күчүн жоготуп, архитектуралык-уруксат берүүчү документтер кайра алынган. Ошондой эле курулуш иштерин токтотуу жөнүндө расмий билдирүү берилген.
Бирок текшерүүнүн жүрүшүндө коюлган талаптарга карабастан, объектте курулуш-монтаждоо иштери уланып жатканы аныкталган.
Аталган мыйзам бузуу үчүн курулуш иштерин жүргүзгөн тарапка 213 миң сом өлчөмүндө айып пул салынды. Ошондой эле окуяга укуктук баа берүү үчүн материалдар Ички иштер министрлигине жөнөтүлдү.
Мындан тышкары, 2026-жылдын 13-июлунда жүргүзүлгөн контролдук текшерүүдө да курулуш иштеринин токтотулбаганы аныкталган.
Жыйынтыгында, мыйзам талаптарын одоно бузгандыгы үчүн "Император Строй" ЖЧКсын Курулуш министрлигинин кара тизмесине киргизүү жана курулуш лицензиясын токтотуу боюнча министрликке сунуш жөнөтүлдү.
