Кыргызстанда шайлоо мыйзамына бир катар өзгөртүүлөр киргизилди
Президент Садыр Жапаров "Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө" конституциялык мыйзамга өзгөртүүлөрдү киргизген мыйзамга кол койду.
Президенттин администрациясынын маалыматына ылайык, мыйзам 2026-жылдын 24-июнунда Жогорку Кеңеш тарабынан кабыл алынган жана өлкөнүн шайлоо мыйзамдарын өркүндөтүүгө багытталган.
Жаңы өзгөртүүлөргө ылайык, Кыргыз Республикасынын Президентинин кезектеги шайлоосу президенттин ыйгарым укуктары аяктаган жылдын январь айынын төртүнчү шаршембисинде өткөрүлөт. Ага ылайык, кийинки президенттик шайлоо 2027-жылдын 27-январына белгиленди.
Ошондой эле Жогорку Кеңештин кезектеги шайлоосу учурдагы чакырылыштын конституциялык мөөнөтү аяктаган айдын шаршембисинде өткөрүлөт.
Мыйзамга ылайык, президенттик жана парламенттик шайлоо күнү менчигинин түрүнө карабастан бардык кызматкерлер үчүн эмгек акысы сакталган дем алыш күнү болуп эсептелет.
Мындан тышкары, мыйзам менен бир катар жаңы жоболор киргизилди. Атап айтканда:
- "шайлоо дареги" институту жоюлду;
- бир шайлоо участогундагы шайлоочулардын саны, эреже катары, 4 миңден ашпоого тийиш;
- талапкерлер жана саясий партиялар документтерди тапшырардан мурда шайлоо фондун түзүүгө милдеттүү;
- шайлоо төгүмү жеке шайлоо фондунун каражаттарынан төлөнөт;
- кол тамгаларды булуттук санарип кол тамга (БСК) аркылуу санарип форматта же кол коюу барактары менен чогултууга мүмкүнчүлүк берилди.
Конституциялык мыйзам расмий жарыяланган күндөн тартып күчүнө кирет.
