Туризм агенттиги: F1 H2O кайыктар жарышынын социалдык-экономикалык мааниси чоң
Ысык-Көлдө өтө турчу Формула-1: H2O эл аралык кайыктар жарышынын социалдык-экономикалык мааниси чоң экенин Туризмди өнүктүрүү боюнча мамлекеттик агенттиктин директорунун орун басары Эрденет Касымов "Биринчи радиого" берген маегинде билдирди.
"Иш-чаранын экономикалык натыйжасы ал аяктагандан кийин бааланат. Канча пайда алып келгени так эсептелет. Бирок бул мелдештин социалдык-экономикалык мааниси сөзсүз чоң болот. Жылдын жыйынтыгы чыкканда анын таасири дагы даана көрүнөт", – деди Эрденет Касымов.
Анын айтымында, мелдешке 10го жакын өлкөнүн командалары катышат. Жарыштар үч күн бою күнүнө болжол менен эки сааттан өтүп, калган убакта туристтер үчүн маданий жана көңүл ачуучу иш-чаралар уюштурулат.
Белгилей кетсек, буга чейин айрым экологдор Формула-1: H2O кайыктар жарышы Ысык-Көлдүн экологиясына терс таасирин тийгизиши мүмкүн экенин айтып чыгышкан. Буга жооп катары аталган агенттик мелдеште экологиялык талаптар толук сакталарын билдирди.
Эске сала кетсек, мелдеш 31-июлдан 2-августка чейин Ысык-Көлдүн Бает айылында өтөт.
