Ысык-Көлдө мыйзамсыз иштеген коомдук тамактануучу жайга айып пул салынды
Ысык-Көл облусунун Кара-Ой айылында архитектуралык-уруксат берүүчү документтери жок мыйзамсыз пайдаланылып келген коомдук тамактануучу жайга 200 миң сом айып пул салынды.
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин маалыматына ылайык, мыйзам бузуу аймактагы курулуш объектилерин текшерүүнүн жүрүшүндө аныкталган.
Тактап айтканда, Кара-Ой айылынын Ж. Абдрахманов көчөсү 1к/1 дарегинде жайгашкан "Хан-Чатыр" коомдук тамактануучу жайы архитектуралык-уруксат берүүчү документтерисиз пайдаланууга берилгени белгилүү болгон.
Текшерүүнүн жыйынтыгында жооптуу тарапка карата административдик чара көрүлүп, 200 миң сом өлчөмүндө айып пул салынды. Ошондой эле мыйзам бузууларды жоюу боюнча жазуу түрүндөгү эскертүү берилди.
Мамлекеттик архитектура-курулуш контролдоо департаменти курулуш иштерин жүргүзүүдө мыйзамдардын, курулуш ченемдеринин жана техникалык талаптардын так сакталышы милдеттүү экенин эскертип, бардык компанияларды жана жеке ишкерлерди мыйзам талаптарын сактоого чакырды.
