Бишкекте топографиялык иштерге санариптик технологиялар киргизилет

Бишкекте топографиялык-геодезиялык иштерди санариптештирүүгө багытталган жаңы программалык чечимдер талкууланды. Бул тууралуу Курулуш министрлигинен билдиришти.

Шаар куруу жана архитектура департаментинин Бишкек шаардык башкы башкармалыгында топографиялык-геодезиялык иштерди санариптештирүү боюнча “ТИМ КРЕДО” компаниясынын өкүлдөрү менен онлайн жолугушуу өттү.

Жолугушууга башкармалыктын начальнигинин орун басары Арсен Кыдыралиев, ГИС, топография жана шаар куруу кадастры бөлүмүнүн начальниги Иманбек Чороев жана тиешелүү адистер катышты.

Жолугушууда инженердик изилдөөлөрдүн маалыматтарын иштеп чыгууга, топографиялык пландарды даярдоого жана геомаалыматтарды башкарууга арналган "КРЕДО ТОПОГРАФИЯ" программалык комплекси тааныштырылды.

Белгиленгендей, бул программаны колдонуу топографиялык маалыматтарды иштеп чыгууну жеңилдетип, геомаалыматтык технологияларды өнүктүрүүгө жана шаар куруу тармагындагы иштердин натыйжалуулугун жогорулатууга мүмкүндүк берет.

Жыйынтыгында тараптар кызматташууну улантуу боюнча макулдашышты.