Бишкектеги №28 мектепте мыйзам бузуулар аныкталып, директор кызматтан алынды
Бишкек шаарынын Ленин райондук прокуратурасы тарабынан жүргүзүлгөн текшерүүнүн жыйынтыгында Ленин районундагы №28 мектеп-комплексинде билим берүү жана финансылык мыйзамдардын талаптары бузулган учурлар аныкталды.
Прокуратуранын маалыматына ылайык, айрым педагогикалык кызматкерлердин билими ээлеген кызмат ордуна жана окуткан сабагына шайкеш келбегени белгилүү болгон. Ошондой эле мектеп директорунун орун басарынын педагогикалык билими жок экени же педагогикалык адистик боюнча кайра даярдоодон өтпөгөнү аныкталган.
Мындан тышкары, айрым кызматкерлерге эмгек милдеттерин иш жүзүндө аткарбаганына карабастан мыйзамсыз түрдө эмгек акы төлөнүп келгени белгилүү болду.
Текшерүүнүн жүрүшүндө мектепке чейинки бөлүмдө тарбияланып жаткан айрым балдар мекеменин эсептик документтерине киргизилбегени жана алар үчүн ай сайын төлөнүүчү каражаттар кассага кириштелбегени да аныкталды.
Аталган фактылар боюнча прокурордук чара көрүү актылары киргизилип, мыйзамсыз сарпталган акча каражаттары толугу менен бюджетке кайтарылды.
Жыйынтыгында мыйзам бузууга жол берген мектептин директору кызматынан бошотулду. Ошондой эле билими мыйзам талаптарына жооп бербеген директордун орун басары да ээлеген кызматынан алынды. Ал эми Ленин райондук билим берүү башкармалыгынын башчысынын тартиптик жоопкерчилиги боюнча маселе Билим берүү жана илим министрлиги тарабынан каралууда.
