Киров суу сактагычынан 600 метр мыйзамсыз балык уулоочу тор чыгарылды
Талас облусундагы Киров суу сактагычында жүргүзүлгөн рейддин жүрүшүндө жалпы узундугу 600 метрге жакын мыйзамсыз синтетикалык тор табылып, суу сактагычтан чыгарылды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Рейд "Айрым суу сактагычтарда балыкты өндүрмөлүк кармоого мораторий киргизүү жөнүндө" Министрлер Кабинетинин токтомунун талаптарынын аткарылышын камсыздоо максатында уюштурулган.
Текшерүүнүн жүрүшүндө мыйзамсыз орнотулган, жалпы узундугу болжол менен 600 метрди түзгөн синтетикалык торлор аныкталып, суу сактагычтан чыгарылды. Аталган факты боюнча тиешелүү акт түзүлдү.
Министрликтин маалыматына ылайык, жыл башынан бери Киров суу сактагычында жалпысынан 13 рейд өткөрүлүп, 3050 метр синтетикалык тор жана 250 килограмм таштанды чыгарылган.
Белгиленгендей, синтетикалык торлор балыктардын табигый көбөйүшүнө тоскоолдук жаратып, суу экосистемасына олуттуу зыян келтирет. Ушуга байланыштуу министрлик жарандарды жаратылышты коргоо талаптарын так сактоого чакырды.
