Кочкордо өстүрүлгөн "Айсберг" салаты экспортко чыга баштады
Кочкор районундагы Мамасылтукум чарбасында өстүрүлгөн "Айсберг" салат жалбырагынын биринчи түшүмү жыйнала баштады. Түшүмдүн бир бөлүгү экспортко жөнөтүлүп, калганы ички рынокто сатылууда.
Суу ресурстары, айыл чарба жана кайра иштетүү өнөр жайы министрлигинин Кочкор районундагы Мамасылтукум чарбасынан «Экотер» кыргыз-чех биргелешкен агро компаниясы 20 гектар жерди ижарага алган.
Компания анын 12 гектарына тамчылатып сугаруу системасын колдонуу менен "Айсберг" салат жалбырагын өстүргөн.
Учурда алгачкы түшүмдү жыйноо иштери жүрүп жатат. Маалыматка ылайык, түшүмдүүлүк гектарына орточо 30 тоннаны түзүүдө.
Өстүрүлгөн "Айсберг" салат жалбырагы коңшу өлкөлөргө экспорттолуп, ошондой эле жергиликтүү базарларда да сатылууда.
