Лейлекте мыйзамсыз көмүр казуудан мамлекетке 201 млн сом зыян келтирилген
Баткен облусунун Лейлек районундагы көмүр казуу иштерин текшерүүнүн жыйынтыгында мамлекетке 201,5 млн сомдон ашык зыян келтирилгени аныкталып, кылмыш иши козголду. Бул тууралуу Башкы прокуратурадан билдиришти.
Текшерүүнүн жүрүшүндө тиешелүү мамлекеттик органдардын жооптуу кызмат адамдары мыйзамсыз иштерди өз убагында токтотууга жана мамлекеттик кызыкчылыктарды коргоого милдеттүү болгонуна карабастан, кызматтык ыйгарым укуктарын талаптагыдай аткарбай, ишканалардын мыйзамсыз иш жүргүзүүсүнө шарт түзгөнү белгиленген.
Прокуратуранын маалыматына ылайык, "К-А" жана "К-А П" ишканалары бөлүнүп берилген жер тилкелеринен сырткары токой фондунун 100 519 чарчы метр жеринин кыртышын мыйзамсыз бузуп, 739 494 куб метр өндүрүш калдыктарын төккөн. Ошондой эле жаратылыш ресурстарын пайдалануу үчүн милдеттүү төлөмдөрдү төлөбөгөнү аныкталган.
Мунун кесепетинен токой жерлерине 66 млн 342 миң 540 сом зыян келтирилип, мамлекеттик бюджетке 135 млн 214 миң 453 сом түшпөй калган. Жалпы келтирилген зыяндын көлөмү 201 млн 556 миң 993 сомду түзгөн.
Аталган фактылар боюнча Кылмыш-жаза кодексинин 337-беренеси ("Кызмат абалын кыянаттык менен пайдалануу") жана 307-беренеси ("Жер казынасын коргоо жана пайдалануу эрежелерин бузуу") менен кылмыш иши козголуп, учурда тергөө амалдары жүрүп жатат.
