"Насыямды төлөп бериңиз, үй алып бериңиз" – Президентке эң көп келген кайрылуулар
Акыркы бир ай ичинде Президентке жарандардан түшкөн кайрылуулардын саны кыйла көбөйдү. Бул тууралуу Президенттин жана Министрлер Кабинетинин чечимдеринин аткарылышын контролдоо башкармалыгынын кайрылуулар менен иштөө секторунун инспектору Жайылбек Дадиев "Биринчи радиого" берген маегинде билдирди.
Анын айтымында, кайрылуулардын көбөйүшүнө Президент Садыр Жапаровдун тапшырмасы менен "Түндүк" мобилдик тиркемесинде ишке киргизилген "Президентке кайрылуу" кызматы өбөлгө түздү.
"Жарандар жаңы сервис аркылуу күнү-түнү кайрылууларын жөнөтүп жатышат. Кайрылуулардын саны ушунчалык көбөйгөндүктөн, кызматкерлер аларды өз убагында каттоодон өткөрүүгө араң жетишүүдө", — деди ал.
Дадиевдин белгилешинче, кайрылуулардын басымдуу бөлүгү жарандардын социалдык жана турмуштук көйгөйлөрүнө байланыштуу. Алар насыя же карыздарын төлөп берүү, турак жай менен камсыз кылуу, жер тилкесин бөлүп берүү сыяктуу өтүнүчтөрдү көп жөнөтүшөт.
Ошондой эле Мамлекеттик ипотекалык компаниянын кезегинде турса да, батирди кезексиз берүүнү суранган кайрылуулар да арбын экенин айтты.
"МИК аркылуу батир берүүдө белгиленген тартип бар. Өзгөчө жагдайлар болбосо, жарандар кезегин күтүшү керек. Учурда курулуп жаткан бардык ипотекалык үйлөр Президенттин көзөмөлүндө. Буга чейин миңдеген жарандар батирлүү болушту, кезекте тургандар да акырындык менен турак жайлуу болушат деп ишенебиз", — деди Дадиев.
