Оштогу Ишкаван айылында 700 орундуу мектептин курулушу 45%га аяктады
Ош шаарындагы Ишкаван айылында салынып жаткан 700 орундуу мектептин курулушунун жалпы даярдыгы 45%га жетти. Объект республикалык бюджеттин эсебинен каржыланып жатат. Бул тууралуу Курулуш министрлигинен билдиришти.
Маалыматка ылайык, учурда имараттын негизги каркасы тургузулуп, ички шыбак иштери жүргүзүлүп, чатырын жабууга даярдык көрүлүүдө.
Долбоорго ылайык, үч кабаттуу мектептин жалпы аянты 5 613 чарчы метрди түзөт. Анда окуу класстары, лабораториялар, ашкана, китепкана, 300 орундуу актовый зал, лифт жана 120 көрүүчүгө ылайыкталган спорт залы болот. Мектепте мүмкүнчүлүгү чектелген балдар үчүн да шарттар каралган.
Мектеп пайдаланууга берилгенден кийин 1,5 миңге жакын окуучунун билим алуусуна шарт түзүлөт.
