Беш-Күңгөйдүн жайыттарында эндуро айдагандарга айып пул салынды
Беш-Күңгөй айылынын үстүндөгү жайыттарда өткөрүлгөн рейддин жүрүшүндө жер кыртышын бузуу фактысы боюнча эки жаран жоопкерчиликке тартылып, жалпысынан 11 миң сом айып пул салынды. Бул тууралуу Жаратылыш ресурстары министрлигинен билдиришти.
Экологиялык жана техникалык көзөмөл кызматынын Бишкек шаары жана Аламүдүн району боюнча башкармалыгы Аламүдүн РИИБдин Жол кыймылынын коопсуздугун камсыздоо бөлүмү менен биргеликте Беш-Күңгөй айылынын үстүндөгү жайыттарда рейд жүргүздү.
Рейд жергиликтүү тургундардын кайрылуусунун негизинде уюштурулуп, жайыттарда "эндуро" үлгүсүндөгү мотоциклдерди айдоодон улам жер кыртышы бузулуп жаткан мыйзам бузуулар аныкталды.
Текшерүүнүн жыйынтыгында эки жаранга административдик протокол түзүлүп, ар бирине 5 500 сомдон айып пул салынды.
Министрлик жарандарды жаратылышка аяр мамиле кылууга, жайыттарды сактоого жана экологиялык мыйзамдардын талаптарын так аткарууга чакырды. Мындай рейддер мындан ары да туруктуу негизде өткөрүлөрү белгиленди.
