Бишкекте муниципалдык жерди мыйзамсыз пайдалануу фактылары аныкталды
Бишкек шаарынын мэри Айбек Джунушалиев Чокан Валиханов көчөсү, 2/4 дарегинде жайгашкан аймакта көчмө жыйын өткөрдү. Бул тууралуу муниципалитеттен билдиришти.
Текшерүүнүн жүрүшүндө онго жакын чарбакер субъект иш алып барган тилкеде бир катар мыйзам бузуулар аныкталды. Муниципалдык аймакта жана жашыл зонада мамлекеттик каттоо номери жок автоунааларды кошкондо транспорт каражаттары мыйзамсыз токтотулганы, ошондой эле муниципалдык жерди өзүм билемдик менен пайдалануу фактылары катталды.
Жыйындын жыйынтыгында Бишкек шаарынын Жол кайгуул кызмат башкармалыгына мыйзамсыз токтотулган, анын ичинде мамлекеттик каттоо номери жок унааларды кыска мөөнөттө эвакуациялоо тапшырылды.
Октябрь районунун прокуратурасына аймактагы объекттердин ишмердүүлүгүнө укуктук баа берүү жана муниципалдык жерди мыйзамсыз пайдаланууга жол берген адамдарды аныктоо милдети жүктөлдү. Мыйзам бузуулар аныкталса, мыйзам чегинде чара көрүлөт.
Муниципалдык инспекцияга көрктөндүрүү эрежелерин бузгандарды жоопкерчиликке тартуу, ал эми Транспорт жана жол-транспорттук инфраструктураны өнүктүрүү департаментине унаа токтотуучу жайларды жөнгө салуучу жол белгилерин орнотуу жана Ауэзов көчөсүнөн Чокан Валиханов көчөсүнө чейинки тилкеде транспорт кыймылын жөнгө салуу тапшырмасы берилди.
Ошондой эле Октябрь районунун акимине чарбакер субъекттер менен биргеликте көп кабаттуу унаа токтотуучу жай уюштуруу жана аймакты санитардык-эстетикалык талаптарга ылайык келтирүү милдети жүктөлдү. Бул иштер аяктаганга чейин аймак күн сайын көзөмөлдөнөт.
Мындан тышкары, "Амира" кафесинин ишмердүүлүгүн санитардык талаптардын жана мыйзамдардын сакталышы боюнча комплекстүү текшерүү тапшырмасы берилди.
