Канат Сагынбаев Таластагы социалдык стационарларды кыдырды
Талас облусуна болгон жумушчу сапарынын алкагында эмгек, социалдык камсыздоо жана миграция министри Канат Сагынбаев министрликтин карамагындагы эки социалдык стационардык мекемеге барды.
Ведомствонун маалыматына ылайык, министр Бакай-Ата районундагы улгайган жарандар жана майыптыгы бар адамдар үчүн жалпы типтеги социалдык стационардык мекемеде, ошондой эле Покровка айылындагы аралаш психоневрологиялык социалдык стационардык мекемеде болуп, алардын ишмердүүлүгү менен таанышты.
Сапардын жүрүшүндө министр социалдык кызмат алуучулардын жашоо шарттарын, аларга көрсөтүлүп жаткан кам көрүү жана медициналык кызматтарды, мекемелердин материалдык-техникалык камсыздалышын жана тамак-аштын сапатын көрүп чыкты. Ошондой эле кызмат алуучулар жана мекеме кызматкерлери менен баарлашып, алардын сунуш-пикирлерин укту.
Канат Сагынбаев улгайган жарандарга жана майыптыгы бар адамдарга сапаттуу кам көрүү мамлекеттик социалдык саясаттын артыкчылыктуу багыттарынын бири экенин белгиледи.
"Жашоого ыңгайлуу шарттарды түзүү менен бирге ар бир жашоочуга урмат-сый көрсөтүлгөн, психологиялык жактан ыңгайлуу чөйрөнү камсыз кылуу маанилүү", – деди министр.
Мындан тышкары, министр мекеме жетекчилери менен кадрдык камсыздоо, инфраструктуранын абалы жана социалдык кызмат көрсөтүүлөрдүн сапатын жогорулатуу маселелерин талкуулап, тиешелүү түзүмдөргө бир катар тапшырмаларды берди.
