Куруучулар күнүнө карата тармактын алдыңкы өкүлдөрү сыйланды
Бүгүн Куруучулар күнүнө жана Курулуш, архитектура жана турак жай-коммуналдык чарба министрлигинин түзүлгөндүгүнүн 101 жылдыгына карата министрликте салтанаттуу иш-чара өттү.
Ведомствонун маалыматына ылайык, анда курулуш, архитектура жана турак жай-коммуналдык чарба министри Нурдан Орунтаев тармак өкүлдөрүн кесиптик майрамы менен куттуктап, курулуш тармагын өнүктүрүүгө кошкон салымы үчүн ыраазычылык билдирди.
Салтанаттын жүрүшүндө министрликтин кызматкерлери, архитектура жана курулуш тармагын өнүктүрүүгө салым кошкон адистер жана өнөктөштөр "Ак ниет кызматы үчүн", "Ардактуу куруучу", "Ардактуу архитектор", "Кызматташтык үчүн" төш белгилери жана Ардак грамоталар менен сыйланышты.
Ошондой эле Бишкек шаардык кеңешинин энчилүү кол сааты Курулуш министри Нурдан Орунтаевге тапшырылып, министрдин орун басарлары жана министрликтин бир катар кызматкерлери медалдар, ордендер, төш белгилер жана Ардак грамоталар менен сыйланышты.
Мындан сырткары, Кыргыз Республикасынын Архитекторлор союзу тарабынан Шаар куруу жана архитектура департаментинин кызматкерлерине архитектура жана курулуш тармагын өнүктүрүүгө кошкон салымы үчүн сыйлыктар ыйгарылды.
Иш-чаранын соңунда министр сыйлык алган тармак өкүлдөрүнө ийгиликтерди каалап, алардын эмгеги өлкөнүн өнүгүшүнө кошкон салымына берилген татыктуу баа экенин белгиледи.
