Кыргызстанда жарым жылда 14,2 млн баш малга ветеринардык профилактика жүргүзүлдү
Ветеринария, мал чарбасын өнүктүрүү, жайыт жана тоют кызматы 2026-жылдын биринчи жарым жылдыгындагы ишинин жыйынтыгын чыгарды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, эпизоотиялык туруктуулукту камсыздоо максатында өлкө боюнча 14,26 млн баш малга ветеринардык-профилактикалык иш-чаралар жүргүзүлүп, жарым жылдык план 110%га аткарылган.
Ошондой эле жыл башынан тарта республика ветеринардык биокаражаттар менен толук камсыздалып, бардык вакциналар жана ветеринардык препараттар аймактарга муздак чынжыр талаптарын сактоо менен 100% жеткирилген.
Мындан тышкары, ветеринардык кызматтын материалдык-техникалык базасын чыңдоо максатында өндүрүштүк муздаткычтар жана термочемодандар менен камсыздоо иштери жүргүзүлгөн.
