Нарындагы кооперативдерде органикалык өндүрүш жана үрөнчүлүк өнүгүүдө
Нарын райондук агрардык өнүктүрүү башкармалыгынын башчысы Алтынбек Ташболотов Учкун айыл аймагындагы "Нур" жана Эмгек-Талаа айыл аймагындагы "ЖБУ" айыл чарба кооперативдерине иш сапары менен барды. Бул тууралуу Айыл чарба министрлигинен билдиришти.
Иш сапардын жүрүшүндө мамлекеттик колдоонун алкагында берилген жер тилкелеринин пайдаланылышы, өндүрүш процесси жана айыл чарба өсүмдүктөрүнүн учурдагы абалы каралды.
Маалыматка ылайык, Министрлер Кабинетинин №309 токтомунун негизинде "Нур" кооперативине 70 гектар жер аянты берилген. Мындан тышкары Нарын райондук мамлекеттик администрациясы тарабынан 80 гектар жерге жамгырлатып сугаруу системасы орнотулуп, ижарага пайдаланууга берилген. Кооператив "Таш-Рабат" бренди менен печенье өндүрүп, продукциясын ички рынокко чыгаруудан тышкары экспортко да жөнөтүп келет.
Ал эми "ЖБУ" айыл чарба кооперативине №309 токтомдун негизинде 55 гектар жер аянты ижарага берилген. Учурда анын 17 гектарына "Аталык" сортундагы биринчи репродукциядагы үрөн себилген. Ошондой эле кооператив кулпунай, капуста жана чычырканакты органикалык ыкма менен өстүрүүдө.
