Ноокаттагы мыйзамсыз кум-шагыл казуудан мамлекетке 18,2 млн сом зыян келтирилген
Ош экологиялык прокуратурасы тарабынан Ноокат районунда кум-шагыл аралашмасын казуу иштеринин мыйзамдуулугу боюнча жүргүзүлгөн текшерүүдө олуттуу мыйзам бузуулар аныкталды. Бул тууралуу Башкы прокуратурадан билдиришти.
Текшерүүнүн жыйынтыгында жер казынасын пайдалануучулар карьерлерди техникалык долбоордо жана мамлекеттик экологиялык экспертизанын корутундусунда көрсөтүлгөн 5 метрден кыйла терең казышканы белгилүү болгон.
Маалыматка ылайык, жеке ишкер Ө.М. карьерди 9 метрге чейин тереңдетип, 13 100 куб метр, ал эми "ЖБИ М-А" ЖЧКсы 10 метрге чейин казып, 20 000 куб метр кум-шагыл аралашмасын мыйзамсыз казып алышкан.
Натыйжада мыйзамсыз алынган кум-шагылдын жалпы көлөмү 33 100 куб метрди түзүп, анын болжолдуу наркы 16 млн 750 миң сом деп бааланган. Мындан тышкары, мамлекетке 1 млн 489 миң 500 сом салыктык зыян келтирилип, жалпы келтирилген зыян 18 млн 239 миң 500 сом деп эсептелген.
Ошондой эле текшерүүдө айрым мамлекеттик органдардын жооптуу кызмат адамдары мыйзам бузууларды билип туруп, аларды токтотуу жана жер казынасын коргоо боюнча мыйзамда каралган чараларды көрбөй, мыйзамсыз иштердин уланышына шарт түзгөнү аныкталган.
Аталган фактылар боюнча Ош экологиялык прокуратурасы тарабынан Кылмыш-жаза кодексинин 337-беренеси ("Кызмат абалын кыянаттык менен пайдалануу") менен кылмыш иши козголуп, учурда тергөө амалдары жүргүзүлүүдө.
