Талас облусунда "Бала ырысы" жөлөкпулу үчүн 9076 жаран арыз берди
30-31-июлда Эмгек, социалдык камсыздоо жана миграция министри Канат Сагынбаев жумушчу сапар менен Талас облусуна барды.
Ведомствонун маалыматына ылайык, сапардын алкагында министр райондук жана шаардык башкармалыктардын ишмердүүлүгү, мамлекеттик кызмат көрсөтүүлөрдүн сапаты жана калкты тейлөө шарттары менен жеринде таанышууда.
Талас шаарында Канат Сагынбаев социалдык камсыздоо боюнча аймактык башкармалыкка барып, мамлекеттик "Бала ырысы" программасынын аткарылышын көрдү. Ошондой эле башкармалыктын кызматкерлери жана жаңы ай сайын берилүүчү жөлөкпулду алып жаткан үй-бүлөлөр менен жолугуп, алардын сунуш-пикирлерин жана жөлөкпулду тариздөөдө жаралган маселелерин укту.
"Бала ырысы” программасы – балалуу үй-бүлөлөрдү мамлекеттик колдоонун маанилүү чарасы. Биздин милдет – жөлөкпул алууга укуктуу ар бир үй-бүлө аны өз убагында, ашыкча бюрократиялык тоскоолдуктарсыз жана толук көлөмдө алышын камсыз кылуу", – деди министр.
Министр ошондой эле калкка социалдык кызматтарды өз убагында жана сапаттуу көрсөтүү министрликтин артыкчылыктуу багыттарынын бири экенин белгиледи.
Маалыматка ылайык, учурда Талас облусунда "Бала ырысы" жөлөкпулун алуу үчүн 9 076 жаран арыз берген.
Министрдин жумушчу сапары уланууда. Анын жыйынтыгында аймактык бөлүмдөрдүн ишин өркүндөтүү жана калкка көрсөтүлүүчү социалдык кызматтардын сапатын жогорулатуу боюнча тиешелүү тапшырмалар берилери айтылды.
