WOAH Кыргызстандын шарпты көзөмөлдөө программасын кайра жактырды
Дүйнөлүк жаныбарлардын саламаттыгын сактоо уюму (WOAH) 2026-жылдын май айында Кыргыз Республикасынын шарп оорусун көзөмөлдөө боюнча расмий программасын кайрадан жактырды. Бул тууралуу Ветеринария, мал чарбасын өнүктүрүү, жайыт жана тоют кызматы 2026-жылдын биринчи жарым жылдыгынын жыйынтыгын чыгарууда билдирди.
Мекеменин маалыматына ылайык, аталган чечим Кыргызстандын ветеринардык системасына болгон эл аралык ишенимдин жогорку деңгээлин тастыктайт.
Ошондой эле кызматтын маалыматы боюнча, өлкөдө малды идентификациялоо иштери уланууда. Учурда ЖИКС маалыматтык системасында 2,344 млн баш ири мүйүздүү мал, 553,4 миң баш жылкы жана 3,5 миң баш чочко катталган.
Ал эми 2026-жылдын алты айында 442,1 миң баш музоо, 45,9 миң баш кулун жана 1 393 баш торопой идентификацияланган. Мындан тышкары, тамак-аш коопсуздугун камсыздоо максатында мамлекеттик мониторингдин алкагында 948 үлгү алынып, 13 838 лабораториялык изилдөө жүргүзүлгөн.
