Базар-Коргондо уруксатсыз курулуп жаткан кыш заводдун иши токтотулду
Жалал-Абад облусунун Базар-Коргон районунда тиешелүү уруксат документтери жок курулуп жаткан кыш заводдун иши токтотулуп, курулушту жүргүзгөн компанияга 200 миң сом айып салынды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, Мамлекеттик архитектура-курулуш контролдоо департаментинин Жалал-Абад региондук башкармалыгы жүргүзгөн текшерүүнүн жүрүшүндө объектте тиешелүү архитектуралык-уруксат берүүчү документтер алынбастан жана милдеттүү мамлекеттик экспертизадан өткөрүлбөстөн курулуш иштери жүргүзүлүп жатканы аныкталган.
Министрликтин маалыматына караганда, мындай өндүрүштүк объектилерди мыйзамда каралган экологиялык, техникалык жана коопсуздук талаптарын сактабастан куруу жарандардын коопсуздугуна жана айлана-чөйрөгө коркунуч жаратышы мүмкүн.
Ошондой эле башкармалыктын адистери тарабынан буга чейин курулуш иштерин токтотуу боюнча бир нече жолу эскертүү берилгенине карабастан, курулуш-монтаждоо иштери улантылган.
Анын негизинде курулуш иштерин жүргүзгөн "Мадина Компани" ЖЧКсына карата тиешелүү акт түзүлүп, объекттеги бардык курулуш иштерин токтотуу боюнча милдеттүү көрсөтмө берилди. Мындан тышкары компанияга 200 миң сом өлчөмүндө айып пул салынып, административдик протокол түзүлгөн.
Учурда кыш заводдун курулуш иштери толугу менен токтотулган.
