ИИМдин эксперт-криминалисттери квалификациясын жогорулатты
Ички иштер министрлигинин Эксперттик-криминалисттик кызматынын кызматкерлери Россия ИИМинин Эксперттик-криминалисттик борборунун адистери өткөргөн квалификацияны жогорулатуу курсун ийгиликтүү аяктап, сертификаттарга ээ болушту.
Министрликтин маалыматына ылайык, окуу курсу Кыргызстан менен Россиянын ички иштер органдарынын кызматташтыгынын алкагында уюштурулуп, эксперт-криминалисттердин кесиптик деңгээлин жогорулатууга багытталды. Анын жүрүшүндө соттук генетиканын заманбап ыкмалары, геномдук изилдөөлөр жана криминалистикалык технологиялар боюнча практикалык билим берилди.
Иш-чаранын алкагында эки тараптуу кызматташтыкка кошкон салымы үчүн Россиянын Ички иштер министрлигинин Эксперттик-криминалисттик борборунун башчысы Вадим Казьмин "Кыргыз милициясына 100 жыл" юбилейлик медалы менен сыйланды.
Ошондой эле борбордун адистери Максим Шанин менен Сергей Романов "Колдоо көрсөткөндүгү үчүн" медалына татыды.
