Кадамжайда курулуп жаткан мектептин бетонунун сапаты текшерилди
Баткен облусунун Кадамжай районунда курулуп жаткан 150 орундуу мектептин курулушунда колдонулган бетондун бекемдиги атайын көчмө лабораториянын жардамы менен текшерилди.
Курулуш, архитектура жана турак жай-коммуналдык чарба министрлигине караштуу Курулушта сертификаттоонун республикалык борборунун адистери Баткен облусунун Кадамжай районундагы Эшме айылында курулуп жаткан 150 орундуу мектептин курулушунда бетондун бекемдигин текшеришти.
Министрликтин маалыматына ылайык, көчмө текшерүүнүн жүрүшүндө бетон конструкциялары бузулбаган абалда атайын жабдуулар менен сыноодон өткөрүлдү.
Мындай ыкма конструкциялардын бүтүндүгүн сактоо менен бетондун иш жүзүндөгү бекемдигин аныктоого жана анын курулуш талаптарына шайкештигин баалоого мүмкүндүк берет.
Министрлик белгилегендей, мындай текшерүүлөр курулуштагы мүмкүн болгон кемчиликтерди өз убагында аныктап, объектилердин сапатын көзөмөлдөөгө шарт түзөт.
