Кочкордо эт багытындагы мал чарбачылыгын өнүктүрүүгө басым жасалууда
Кочкор райондук мамлекеттик администрациясынын башчысы – аким Баялы Досалиев, акимдин орун басары Нурлан Элчибаев жана райондук ветеринардык башкармалыктын башчысы Темирлан Мураталиев "Сал Эм" асыл тукум чарбасынын ишмердүүлүгү менен таанышты.
Айыл чарба министрлигинин маалыматына ылайык, иш сапардын жүрүшүндө чарбанын учурдагы абалы, малды багуу шарттары, асыл тукум мал чарбасын өнүктүрүү жана эт багытындагы бодо малдын санын көбөйтүү боюнча аткарылып жаткан иштер талкууланды.
Учурда "Сал Эм" чарбасында Абердин-ангус породасындагы 116 баш бодо мал багылууда. Анын ичинде 76 уй, 2 бука жана 38 музоо бар.
Белгиленгендей, чарба асыл тукум малдын санын көбөйтүүгө өзгөчө көңүл буруп, аймакты сапаттуу асыл тукум мал менен камсыздоого жана эт багытындагы мал чарбачылыгын өнүктүрүүгө салым кошуп келет.
Иш сапардын соңунда чарбаны мындан ары өнүктүрүү, асыл тукум малдын башын көбөйтүү жана мамлекеттик колдоо механизмдерин натыйжалуу пайдалануу маселелери боюнча пикир алышуу болду.
