Көк-Жардагы 750 орундуу мектептин курулушу кызуу жүрүүдө
Курулуш, архитектура жана турак жай-коммуналдык чарба министрлигинин маалыматына ылайык, Бишкек шаарындагы Көк-Жар айылында 750 орундуу жаңы мектептин курулушу активдүү уланууда.
Ведомствонун маалыматына тылайык, объекттин курулушу үстүбүздөгү жылдын февраль айында башталган. Учурда курулуш-монтаждоо иштери 75%га аткарылды.
Долбоорго ылайык, жалпы аянты 3 600 чарчы метрди түзгөн үч кабаттуу мектепте заманбап окуу класстары, лабораториялар, китепкана, азык-түлүк кампасы бар ашкана, компьютердик кабинеттер, жыйындар залы, эмгек кабинеттери жана спорт зал каралган.
Министрлик белгилегендей, курулуштун сапаты жана аткарылып жаткан иштердин ар бир этабы тиешелүү департаменттер тарабынан туруктуу көзөмөлдөнүп жатат.
Белгилей кетсек, учурда Бишкек шаарында мындан сырткары дагы 19 мектептин курулушу жүрүүдө. Бул долбоорлор борбор калаадагы мектеп жетишсиздигин азайтып, окуучулар үчүн заманбап билим берүү шарттарын түзүүгө багытталган.
