Азык-түлүк баалары: Кыргызстанда эмне кымбаттап, эмне арзандады?

Суу ресурстары, айыл чарба жана кайра иштетүү өнөр жайы министрлиги Кыргызстанда, ошондой эле Россия жана Казакстанда негизги азык-түлүк товарларынын баасына салыштырма мониторинг жүргүздү.

Министрликтин маалыматына ылайык, Кыргызстанда күрүчтүн баасы 4,4%, импорттолгон 1-сорттогу буудай уну 3,6%, тазаланган күн карама майы 2,3%, каймак майы 1,4%, уй жана кой эти 0,9%дан, кумшекер 0,4%га кымбаттаган.

Ошол эле учурда сабиз 1,0%, жергиликтүү 1-сорттогу буудай уну жана картошка 0,8%дан, баш пияз 0,6% жана пастерленген сүт 0,2%га арзандаганы белгиленди.

Казакстанда болсо баалар негизинен төмөндөө багытында өзгөргөн. Атап айтканда, картошка 3,4%, баш пияз 2,5%, күрүч 2,2%, пастерленген сүт менен сабиз 2,0%дан, жергиликтүү ун, бөлкө нан, каймак май, уй жана кой эти 1,9%дан, күн карама майы 1,7%, макарон азыктары 1,6%, жумуртка 1,4% жана кумшекер 1,1%га арзандаган.

Россияда мониторинг мезгилинде кумшекердин баасы гана 1,8%га өскөн. Ал эми баш пияз 2,5%, картошка 2,1%, жумуртка 1,7%, күрүч, сабиз жана каймак майы 1,0%дан, 1-сорттогу буудай уну, бөлкө нан жана пастерленген сүт 0,6%дан, кой эти 0,5%, күн карама майы, уй эти жана вермишель 0,4%дан төмөндөгөн.

Министрлик белгилегендей, мониторинг өлкөлөрдөгү негизги азык-түлүк товарларынын баа динамикасын салыштыруу жана ички рыноктогу абалды көзөмөлдөө максатында туруктуу негизде жүргүзүлүп турат.