Кыргызстанда тергөөчүлөр үчүн санариптик окутуунун жаңы форматы ишке кирди
Башкы прокуратура ички иштер органдарынын кызматкерлерин "Кылмыштардын бирдиктүү реестри" системасында иштөөгө үйрөтүү үчүн практикага багытталган окутуунун жаңы форматын ишке киргизди.
Башкы прокуратуранын маалыматына ылайык, анын алкагында Бишкек шаардык ички иштер башкы башкармалыгынын жана аймактык ички иштер органдарынын жаңы дайындалган жана иштеп жаткан тергөөчүлөрү үчүн "Электрондук кылмыш ишин" жүргүзүү боюнча практикалык окуу уюштурулду.
Окутуу реалдуу иш шарттарына мүмкүн болушунча жакындатылган атайын тесттик чөйрөдө өтүп, катышуучулар санариптик инструменттерди колдонуу боюнча практикалык көндүмдөрүн өркүндөтүштү.
Жыйынтыгында кызматкерлерди даярдоонун бирдиктүү методикасы жана алардын кесиптик компетенцияларын баалоочу чек-баракча иштелип чыкты. Бул документтер мындан ары өлкөнүн бардык укук коргоо органдарында ушундай окутууларды өткөрүүдө колдонулат.
