Никеге арызды эми "Түндүк" аркылуу берсе болот
Кыргызстанда никени каттоого арыз берүү кызматы "Түндүк" мобилдик тиркемесинде жеткиликтүү болду. Бул тууралуу "Кызмат" мамлекеттик мекемесинен билдиришти.
Кызматты колдонуу үчүн алгач демилгечи "Никени каттоо" кызматын тандап, болочок жубайынын жеке идентификациялык номерин (ИЖН) киргизип, Face ID аркылуу өздүгүн ырастайт.
Андан соң экинчи тарап билдирүү алып, маалыматтарды текшерип, макулдугун ырастайт жана Face ID аркылуу идентификациядан өтөт.
Андан кийин эки тарап тең арызга электрондук колтамга менен кол коюшат. Арыз автоматтык түрдө Жарандык абалдын актыларын каттоо (ЖААК) системасына кароого жөнөтүлөт.
Арыз каралып бүткөндөн кийин жыйынтыгы тууралуу билдирүү колдонуучуларга жөнөтүлөт.
Жаңы кызматтын артыкчылыгы – документ тапшыруу этабында ЖААК бөлүмүнө баруунун зарылдыгы жок. Арыз берүү процесси толугу менен "Түндүк" тиркемеси аркылуу башталат.
