Оштогу Ломоносов мектебинин жаңы имаратынын курулушу кызуу жүрүүдө
Курулуш, архитектура жана турак жай-коммуналдык чарба министрлигинин маалыматына ылайык, Ош шаарындагы М.В. Ломоносов атындагы мектептин ордуна 750 орундуу заманбап жаңы мектеп курулуп жатат. Бул тууралуу ведомстводон билдиришти.
Маалыматка ылайык, президент Садыр Жапаровдун тапшырмасынын негизинде ишке ашырылып жаткан долбоордун курулушу үстүбүздөгү жылдын февраль айында башталган.
Учурда төрт кабаттуу имараттын негизги конструкциялары толугу менен тургузулуп, биринчи жана экинчи кабаттарда ички жасалгалоо иштери жүргүзүлүүдө.
Долбоор боюнча мектептин жалпы аянты 10 896 чарчы метрди түзөт. Имарат төрт блоктон туруп, жертөлөсү менен кошо төрт кабаттан турат.
Жаңы билим берүү мекемесинде 37 окуу классы, лабораториялар, китепкана, ашкана, эмгекке үйрөтүү кабинеттер, медициналык бөлмө, жыйындар залы жана заманбап спорт залы каралган.
Министрлик белгилегендей, курулуштун бардык этаптары тиешелүү департаменттер тарабынан туруктуу көзөмөлдөнүп, аткарылып жаткан иштердин сапаты үзгүлтүксүз текшерилип жатат.
