Оштун мэри аскер бөлүгүндөгү шарттар менен таанышты
Ош шаарынын мэри Жанарбек Акаев Ички иштер министрлигинин Ички аскерлеринин 7703 аскер бөлүгүнө иш сапары менен барды.
Мэриянын маалыматына ылайык, шаар башчысы аскер бөлүгүнүн кызматтык ишмердүүлүгү, күжүрмөн даярдыгы, материалдык-техникалык базасы жана өздүк курам үчүн түзүлгөн шарттар менен жеринде таанышты.
Иш сапарынын жүрүшүндө бөлүктүн жетекчилиги коомдук коопсуздукту камсыз кылуу, мамлекеттик маанидеги объектилерди кайтаруу, ошондой эле өзгөчө кырдаалдар жана массалык иш-чаралар учурунда коомдук тартипти сактоо боюнча аткарылып жаткан иштер тууралуу маалымат берди.
Жанарбек Акаев казарманы, ашкананы, медициналык пунктту, спорт аянтчасын жана жоокерлер пайдаланган башка жайларды кыдырып, аскер кызматкерлери менен баарлашты. Ошондой эле алардын кызмат өтөөсү жана жашоо шарттары боюнча сунуш-пикирлерин укту.
Жолугушууда аскер кызматкерлеринин социалдык-тиричилик шарттарын жакшыртуу, инфраструктураны өнүктүрүү жана материалдык-техникалык камсыздоону чыңдоо маселелери да каралды.
Иш сапарынын соңунда шаар мэри Ички аскерлер өлкөдө мыйзамдуулукту, коомдук тартипти жана жарандардын коопсуздугун камсыз кылууда маанилүү роль ойной турганын белгилеп, өздүк курамга ийгиликтерди каалады.
