Таласта жаратылышты коргоо боюнча түшүндүрүү иштери жүргүзүлдү
Талас облусунда өзгөчө корголуучу жаратылыш аймактарын жана жайыттарды сактоо максатында туристтерге, эс алуучуларга жана жергиликтүү тургундарга экологиялык талаптарды сактоо боюнча түшүндүрүү иштери жүргүзүлдү.
Жаратылыш ресурстары, экология жана техникалык көзөмөл министрлигинин Талас аймактык башкармалыгы Талас облустук ички иштер башкармалыгынын Туристтик милициясы менен биргеликте жаратылышты коргоого багытталган алдын алуу жана түшүндүрүү иштерин жүргүздү.
Иш-чаранын негизги максаты өзгөчө корголуучу жаратылыш аймактарын, жайыт жерлерин жана табигый экосистемаларды сактоо болду.
Рейддердин жүрүшүндө туристтерге, эс алуучуларга жана жергиликтүү тургундарга автоунаалар жана эндуро-мотоциклдер менен жайыттарда жүрүүнүн жаратылышка тийгизген терс таасири түшүндүрүлдү. Ошондой эле экологиялык мыйзамдардын талаптарын сактоо, белгиленген каттамдар менен гана жүрүү жана айлана-чөйрөгө аяр мамиле кылуу зарылдыгы боюнча эскертүүлөр берилди.
Министрлик жарандарды жана аймактын конокторун жаратылышты коргоо боюнча талаптарды так сактоого чакырып, мындай алдын алуу иш-чаралары экологиялык мыйзам бузуулардын алдын алууга багытталганын белгиледи.
