Ысык-Көлдө мыйзамсыз курулуш үчүн компанияга 200 миң сом айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ысык-Көл региондук башкармалыгы "Фемили Резорт" эс алуу жайына пландан тышкаркы текшерүү жүргүздү.
Министрликтин маалыматына ылайык, текшерүү Бишкек экологиялык прокуратурасынын көрсөтмөсүнүн негизинде уюштурулган.
Текшерүүнүн жүрүшүндө объекттин алты блогунда бекитилген долбоордук документацияга өзгөртүү киргизилбестен жана тиешелүү уруксат берүүчү документтер алынбастан кошумча мансард кабаттар курулганы аныкталган. Бул Кыргыз Республикасынын "Шаар куруу жана архитектура жөнүндө" мыйзамынын талаптарын бузуу катары бааланган.
Аталган мыйзам бузуулар боюнча курулуш иштерин жүргүзгөн "Бекем Строй" ЖЧКсына акт түзүлүп, мыйзам бузууларды жоюу тууралуу көрсөтмө берилди. Ошондой эле компанияга 200 миң сом өлчөмүндө административдик айып салынды.
Мындан тышкары, мыйзам бузуулар толук жоюлуп, объект мыйзам талаптарына ылайык келтирилгенге чейин курулуш-монтаждоо иштерин токтотуу жөнүндө чечим кабыл алынды.
