Бишкек мэри: Же иштеш керек, же кызматты бошотуу керек
Бишкек шаарынын мэри Айбек Джунушалиевдин төрагалыгы алдында өткөн аппараттык жыйында муниципалдык кызматтардын жана шаардык түзүмдөрдүн ишинин натыйжалуулугу талкууланды.
Мэриянын маалыматына ылайык, жыйындын жүрүшүндө калаа башчысы тапшырмалардын аткарылышына жана белгиленген мөөнөттөрдүн сакталышына көзөмөлдү күчөтүү зарылдыгын белгиледи.
Анын айтымында, көпчүлүк учурда тапшырмалар белгиленген мөөнөттө аткарылбай, айрым маселелердин чечилиши создугуп жатат.
"Мен берген тапшырмалардын алкагында текшерүүлөрдү жүргүзүп, ар бир жетекчинин ишине баа бериңиздер. Көп учурда мөөнөттөр бузулуп, тапшырмалар аткарылбай калууда. Биз көптөгөн шылтоолорду угабыз, бирок жыйынтык жок. Жумушка болгон талаптар күндөн-күнгө өсүүдө. Же иштеш керек, же ээлеген кызматты бошотуу керек", — деди Айбек Джунушалиев.
Жыйындын жыйынтыгында шаар мэри коюлган тапшырмалардын аткарылышын эске алуу менен ар бир жетекчинин ишмердүүлүгүнө өзүнчө баа берип, тиешелүү сунуштарды даярдоону тапшырды.
