Бишкек мэри жол курулуштарын текшерип, подрядчыларга эскертүү берди
Бишкек шаарынын мэри Айбек Джунушалиев көчмө жыйындын алкагында борбор калаада реконструкцияланып жана капиталдык оңдолуп жаткан жол курулуш объектилерин жеринде текшерди.
Муниципалитеттен билдиришкендей, калаа башчысы Миңжылкыев, Муромская, Санжыра, Ала-Арча, Проектируемая, Жайыл баатыр, Безымянная, Семетей, Жеңиштин 50 жылдыгы, Мамбет Иманалиев, Эркин жана Элебесов көчөлөрүндө жүргүзүлүп жаткан иштердин сапаты жана аткаруу темпи менен таанышты.
Текшерүүнүн жүрүшүндө Муромская көчөсүндө биринчи катмардагы асфальтты төшөө чечими кабыл алынды. Ал эми экинчи катмар инженердик иштер жана кудуктардын деңгээлин көтөрүү аяктагандан кийин төшөлөт.
Жыйынтыгында шаар мэри райондук администрациялардын башчыларына жол куруу иштерин туруктуу көзөмөлдөп, бардык объектилердин белгиленген мөөнөттө жана сапаттуу бүткөрүлүшүн камсыздоону тапшырды.
Ошондой эле Айбек Джунушалиев курулуш иштери жай жүрүп жаткан тилкелерде подряддык уюмдарды алмаштыруу боюнча тапшырма берип, инженердик коммуникациялардан улам жаралган маселелерди ыкчам чечүүнү тиешелүү кызматтарга жүктөдү.
