Бишкекте алты айда 6163 мыйзамсыз объект демонтаждалды
Бишкек шаардык мэриясында өткөн аппараттык жыйында Жер пайдаланууну контролдоо башкармалыгы 2026-жылдын биринчи жарым жылындагы ишинин жыйынтыгын сунуштады.
Башкармалыктын маалыматына ылайык, отчеттук мезгилде борбор калаада мыйзамсыз орнотулган 6 163 объектдемонтаждалган.
Жыйында шаар мэри Айбек Джунушалиев башкармалыктын ишинин оң жыйынтыктарын белгилөө менен бирге, негизги көрсөткүч түзүлгөн протоколдордун же өндүрүлгөн айып пулдардын саны эмес, шаардагы тартипти чыңдоо жана шаар келбетин жакшыртуу болушу керектигин белгиледи.
Ошондой эле мэр төрт административдик райондун башчыларына шаарды көрктөндүрүү эрежелерин жана коопсуздук талаптарын бузуп иштеп жаткан мыйзамсыз объекттерди демонтаждоо иштерин күчөтүүнү тапшырды.
Мындан тышкары, Шанхай кызматташтык уюмунун иш-чараларына даярдыктын алкагында оңдолуп жаткан көчөлөрдү комплекстүү көрктөндүрүүнү жана аялдама комплекстерин орнотуу иштерин тездетүү боюнча тиешелүү кызматтарга тапшырмалар берилди.
Айбек Джунушалиевдин айтымында, мындай иштердин негизги максаты — айып пул өндүрүү эмес, шаар тургундарынын мыйзамды жана коомдук тартипти сактоо маданиятын калыптандыруу болуп саналат.
