Бишкектеги "Алтын Ордо" конушунун 9 көчөсүнө жарык орнотулду
Ленин районундагы "Алтын Ордо" конушунун тогуз көчөсүндө тышкы жарыктандыруу системасын орнотуу иштери толугу менен аяктады. Бул тууралуу мэриядан билдиришти.
Бишкек шаарынын Ленин районундагы "Алтын Ордо" конушунда тогуз көчөгө заманбап тышкы жарыктандыруу орнотулду.
Мэриянын маалыматына ылайык, "Бишкек жарык" муниципалдык ишканасы тарабынан Аян, Сары-Өзөн, Керемет, Нурислам, Нурзаман, Ак-Шоола, Сулайман-Тоо, Ак-Нур жана Баян көчөлөрүндө жарыктандыруу иштери аяктады.
Долбоордун алкагында СИП 4×16 үлгүсүндөгү өзүн-өзү көтөрүүчү изоляцияланган зымды колдонуу менен 5 миң метр электр линиясы тартылып, кубаттуулугу 50 Вт болгон 109 заманбап LED чырагы орнотулду.
Белгиленгендей, жаңы жарыктандыруу көчөлөрдүн жарык болушун камсыздап, жол кыймылынын жана жөө жүргүнчүлөрдүн коопсуздугун жогорулатууга, ошондой эле кечки убакта тургундар үчүн ыңгайлуу шарттарды түзүүгө мүмкүндүк берет.
Аталган иштер Ленин районунун аймагын көрктөндүрүү жана инженердик инфраструктураны өнүктүрүү боюнча жүргүзүлүп жаткан иш-чаралардын алкагында аткарылды.
