Караколдо олимпиадалык бассейни бар спорт комплекси курулуп жатат
Каракол шаарынын Кашка-Суу кичи районунда 12 гектар аянтка эл аралык талаптарга жооп берген заманбап спорт комплексинин курулушу уланууда.
Курулуш, архитектура жана турак жай-коммуналдык чарба министрлигинин маалыматына ылайык, долбоордун алкагында 275 орундуу спорт интернаты, эл аралык стандарттагы көп функционалдуу спорт комплекси, олимпиадалык стандарттагы бассейн жана 200 орундуу мейманкана курулат.
Учурда курулуш-монтаждоо иштери бекитилген графикке ылайык жүрүп жатат. Жер казуу иштеринин негизги бөлүгү аяктап, пайдубалды куруу жана монолиттүү темир-бетон конструкцияларын тургузууга даярдык көрүлүүдө.
Министрлик белгилегендей, жаңы спорт комплекси спортчуларды даярдоого, окуу-машыгуу жыйындарын өткөрүүгө жана эл аралык деңгээлдеги спорттук мелдештерди уюштурууга шарт түзөт.
Долбоордун курулуш-монтаждоо иштери "Кыргызкурулуш" мамлекеттик ишканасынын көзөмөлүндө жүргүзүлүүдө.
