Бишкек мэри алты айда 600дөн ашык тургунду жеке кабыл алды
Бишкек шаарынын мэри Айбек Джунушалиев 2026-жылдын башынан бери борбор калаанын 600дөн ашык тургунун жеке кабыл алды. Кабыл алуулар шаар тургундарынын көйгөйлөрүн жеринде угуп, аларды ыкчам чечүүгө багытталган.
Мэриянын маалыматына ылайык, жарандар негизинен жер тилкелерин мыйзамдаштыруу, аймактарды көрктөндүрүү, коммуналдык чарба, жолдорду оңдоо жана куруу, коомдук транспорт жана башка шаардык маанидеги маселелер боюнча кайрылышкан.
Жеке кабыл алууларга видеоконференция аркылуу райондордун акимдери жана шаардык кызматтардын жетекчилери да катышып, көтөрүлгөн маселелерди ыкчам кароо жана тиешелүү чечимдерди кабыл алуу камсыздалууда.
Ар бир кайрылуу боюнча мэр тиешелүү кызматтарга тапшырмалар берип, маселелерди белгиленген мөөнөттө жана ар тараптуу кароону милдеттендирди.
Мындан тышкары, муниципалитет башчысы шаар тургундары менен көчмө жолугушууларды да туруктуу өткөрүп келет. 2026-жылдын биринчи жарым жылдыгында мындай форматта 22 жолугушуу уюштурулуп, ага 3 370 шаар тургуну катышкан. Жыйынтыгында 1 102 жарандан 1 704 кайрылуу кабыл алынып, алардын бардыгы тиешелүү шаардык кызматтар тарабынан ишке алынган.
Бишкек шаарынын мэриясы шаар тургундары менен ачык диалогду камсыз кылуу жана жарандардын кайрылууларын өз убагында кароо иштерин мындан ары да улантарын билдирди.
