Садовое айылындагы мектеп 170 млн сомго капиталдык оңдоодон өткөрүлүүдө
Курулуш, архитектура жана турак жай-коммуналдык чарба министрлигине караштуу "Кыргызкурулуш" мамлекеттик ишканасы Чүй районунун Садовое айылындагы Иса Укуев атындагы мектепте капиталдык оңдоо иштерин жүргүзүүдө.
Ведомствонун маалыматына ылайык, долбоор республикалык бюджеттин эсебинен каржыланып, анын жалпы наркы 170 миллион сомду түзөт.
Капиталдык оңдоонун алкагында мектеп имараты толугу менен жаңыланып, ички жасалгалоо иштери жүргүзүлүүдө. Ошондой эле бардык инженердик тармактар алмаштырылып, көмүр менен иштеген жаңы жылытуу системасы орнотулду.
Мындан тышкары, окуу класстары, лаборатория, китепкана, ашкана, жыйындар залы жана спорт залы заманбап талаптарга ылайык оңдолуп жатат. Учурда имараттын сырткы фасадын жасалгалоо иштери уланууда.
Белгилей кетсек, мектеп имараты союз мезгилинде курулуп, ошондон бери биринчи жолу капиталдык оңдоодон өтүп жатат. Мурда 504 окуучуга ылайыкталган билим берүү мекемесиндеги жыйындар залы менен спорт залында толук шарт жок болгондуктан, алар пайдаланылбай келген.
Оңдоо иштери аяктагандан кийин мектеп толук пайдаланууга берилип, окуучулар заманбап жана ыңгайлуу шартта билим алуу мүмкүнчүлүгүнө ээ болушат.
