Жумгалдагы курулуш объектисинде мыйзам бузуулар аныкталды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Нарын региондук башкармалыгы тарабынан курулуш объектилеринде мыйзам талаптарынын сакталышына туруктуу негизде көзөмөл жүргүзүлүүдө.
Көзөмөл иш-чараларынын алкагында Жумгал районунун Түгөл-Сай айылында курулуп жаткан суткалык жөнгө салуу бассейнинин (БСР) курулушунда мыйзам бузуу фактылары аныкталды. Текшерүүнүн жүрүшүндө курулуш иштери белгиленген курулуш ченемдеринин жана техникалык регламенттердин талаптарын бузуу менен жүргүзүлүп жатканы белгилүү болду.
Аныкталган мыйзам бузууларга байланыштуу курулуш иштерин жүргүзүп жаткан "Техно-Центр" ЖЧКсынакарата тиешелүү акт түзүлүп, 200 миң сом өлчөмүндө айып пул салынды. Ошондой эле мыйзам бузууларды белгиленген мөөнөттө жоюу боюнча милдеттүү көрсөтмө берилди.
Мамлекеттик архитектура-курулуш контролдоо департаменти курулуш иштерин жүргүзгөн бардык юридикалык жана жеке жактарды Кыргыз Республикасынын мыйзамдарынын, курулуш ченемдеринин жана техникалык регламенттердин талаптарын так сактоого чакырды.
