Бишкекте автокраны оодарылган компанияга 200 миң сом айып салынды
Бүгүн Бишкек шаарынын Арстанбек Дүйшеев көчөсүндө курулуп жаткан көп кабаттуу турак жайдын курулуш аянтчасында жүк көтөрүүчү автокран оодарылып кетти. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, окуя тууралуу кабар түшөрү менен министрликке караштуу Мамлекеттик архитектура-курулуш контролдоо департаменти тарабынан ыкчам текшерүү жүргүзүлгөн.
Текшерүүнүн жыйынтыгында автокран темир түтүктөрдү көтөрүү учурунда жүк көтөрүүчү техниканын туруктуулугу талаптагыдай камсыздалбагандыктан оодарылып кеткени аныкталган.
Окуядан жабыркагандар болгон эмес. Бирок автокранды жылдыруу маалында анын жанында турган жеңил унаанын сырты чийилип кеткен. Курулуш компаниясы келтирилген чыгымды толугу менен өз эсебинен калыбына келтирерин билдирген.
Курулуш иштеринде коопсуздук талаптарын жана курулуш ченемдерин бузгандыгы үчүн "Нурзаман" ЖЧКсына 200 миң сом өлчөмүндө айып пул салынды. Мындан тышкары, объекттин прорабы менен автокрандын машинисти тиешелүү сертификаттарынан ажыратылды.
Ошондой эле мамлекеттик көзөмөлдү талаптагыдай жүргүзбөгөндүгү үчүн Мамлекеттик архитектура-курулуш контролдоо департаментинин жооптуу адисине тартиптик жаза колдонулуп, ал ээлеген кызматынан бошотулду.
