Чүйдө курулуш компаниясын кара тизмеге киргизүү маселеси каралууда
Мамлекеттик архитектура-курулуш контролдоо департаментинин Чүй региондук башкармалыгы тарабынан Москва районунун Ленин көчөсү №99 дарегинде курулуп жаткан 7 кабаттуу турак жай объектисине текшерүү жүргүзүлдү. Бул тууралуу Курулуш, архитектура жана турак жай-коммуналдык чарба министрлигинен билдиришти.
Текшерүүнүн жыйынтыгында курулуш иштери тиешелүү уруксат берүүчү документтерсиз жүргүзүлүп жаткандыгы аныкталган.
Буга чейин аталган мыйзам бузуу боюнча "Император Строй" ЖЧКсына карата акт түзүлүп, 200 миң сом өлчөмүндө айып пул салынган. Ошондой эле мыйзам бузууларды жоюу боюнча милдеттүү көрсөтмө берилип, курулуш-монтаждоо иштери убактылуу токтотулган.
Бирок компания берилген көрсөтмөлөрдү жана мыйзам талаптарын аткарбай, курулуш-монтаждоо иштерин улантканы аныкталды.
Ушуга байланыштуу мыйзам чегинде чара көрүү үчүн тиешелүү материалдар Чүй облусунун Ички иштер башкы башкармалыгына жөнөтүлдү.
Мындан тышкары, "Император Строй" ЖЧКсынын курулуш лицензиясынын колдонуу мөөнөтүн 90 күнгө токтотуу маселеси мыйзамда белгиленген тартипте каралууда.
