Сузактын Кара-Булак айылында 99 млн сомго жаңы мектеп курулду
Жалал-Абад облусунун Сузак районунун Кара-Булак айылында 150 орундуу жаңы мектептин курулушу аяктады. Объект Турак жай-жарандык курулуш департаменти тарабынан республикалык бюджеттин эсебинен курулуп, анын жалпы наркы 99 миллион сомду түздү.
Курулуш иштери 2025-жылы башталган. Учурда эки кабаттуу мектеп имараты толугу менен бүткөрүлүп, айланасын көрктөндүрүү иштери жүргүзүлүүдө.
Долбоорго ылайык, жалпы аянты 1281 чарчы метр болгон билим берүү мекемесинде окуу класстары, лаборатория, китепкана, ашкана, жыйындар залы, эмгек кабинеттер, дарыгердин бөлмөсү жана бардык шарттары каралган спорт залы жайгашкан.
Жаңы мектепти жаңы окуу жылынын башталышы менен пайдаланууга берүү пландалууда.
Бул долбоор аймактагы социалдык инфраструктураны өнүктүрүүгө жана окуучулар үчүн заманбап билим берүү шарттарын түзүүгө багытталган.
