Борбордогу "Аска-Таш" комплексинин аймагы көрктөндүрүлүүдө
Бишкек шаарынын мэриясынын Капиталдык курулуш башкармалыгы тарабынан Фучик көчөсүндө жайгашкан "Аска-Таш" мемориалдык комплексиндеги фонтандарды оңдоо жана аймагын көрктөндүрүү иштери уланууда.
Мэриянын маалыматына ылайык, аталган иштер Шанхай кызматташтык уюмуна (ШКУ) мүчө мамлекеттердин башчыларынын кеңешинин жыйынына даярдык көрүүнүн алкагында жүргүзүлүүдө.
Долбоорго ылайык, фонтандар комплекстүү оңдолуп, ички жана тышкы инженердик тармактар толугу менен алмаштырылууда. Мындан тышкары, аймакты көрктөндүрүү максатында таман таш төшөө, автоматтык сугаруу системасынын түтүктөрүн орнотуу жана башка курулуш-монтаждоо иштери аткарылууда.
Учурда объектте таман таш төшөө иштери уланууда. Фонтандардын чөйчөктөрү толугу менен бетондолуп, гранит менен капталууда. Курулуш-монтаждоо иштери бекитилген графикке ылайык жүрүп жатат.
Долбоор ишке ашырылгандан кийин мемориалдык комплекстин инженердик инфраструктурасы жаңыланып, архитектуралык көрүнүшү жакшыртылат. Ошондой эле борбор калаанын тургундары жана коноктору үчүн ыңгайлуу шарттар түзүлөт.
Курулуш иштерин "Гранд Про" ЖЧКсы жүргүзүүдө.
